اللهجة الفلاحي

[الفـ العربي ـارس]

السلام عليكم ورحمة الله
كم انا شغوف بسماع وترديد اللغة الفلاحي والتي بدأ الكثير منا بنسيانها الى درجة ان بعض الكلمات أصبحت مضحكة للغاية لأنها اندثرت.
(وهنا لا نقصد النيل من اللغة العربية ونعلم جيداً بأن اللهجات هذه لا تمُت للغة العربية بصلة حيث أنها مجرد لكنات)

يتميز اهل الشمال بإستخدام الهمزة بدل حرف القاف بينما يستخدم اهل الضفة الغربية حرف الكاف عِوضاً عنها.
فيكون قلت لك  - أولت إيلك لدى الشمال - اما الضفة الغربية فتكون - كولت إيلك او كولت لتش

قد اكون الأقل حظاً منكم لقلة سماعي لهذه اللهجة ولكني احبها جداً.

طولكم = طولتشرم
كيف حالك = تشيف حالتش
وين كنت = وين تشُنت
قرفان = شي بيكزز / شي بيأزز
يكفي = بيتشفي
كيك (كعك) = تشعتش
كرسي = تشُرسي
كنافة = تشنافيه
كسل / كسلان = تشسل / تشسلان
حجر = دبشه
هيك = هيتش
بكرا = إمبُتشرا
مخربط = مجعلتش / إمتشعبل / إمدعلتش
اقطع = إكرت / اأرُط
قدم = إجر
يضيع وقت = كاعد بيكسع كمل / آعد بيأسع أمل

إسا هذا الحتشي مش نكل تُشل اللي الكمات هايه كعدت تشثير حتى تشتابتهن وعلشان هيتشي بدي منتشن كلتشن تتشبن الكلمات اللي عندتشن.

[جنين]

ههههههههههههههه
ماشي حنكتب الكلمات اللي عنا
ملعقة_خاشوكة
سكينة_خوصة
الملابس المناسبة او الشي الذي في مكانه بالضبط_على الحكروك او على الحشروش
جالس و ثابت في مكان_كاعد متكند
الكوربة = راس الشارع = لفة آخر الشارع
بنكيت = الرصيف في الشارع
نتفة = اقل من شوية
 عشرطعش = يقصد فيها الكثرة من الشئ

معصلج = مزرجن = مش راضي أو بمعنى آخر راكب راسه

قح = عالاخر

بدكاش = ما بدك
شاكوش = مطرقة

بوزك = وجهك

احلقلو = طنشو = ماتعبرهوش

ضلك كاوي = ضلك ماشي على طول (نفس الطريق )

يختي = اسلوب نداء للمؤنث

بعكش = فتش = ابحث = دور

بيكدي والا كمان؟

[جنين]

الظاهر ما حد غيري بعرف اللهجة الفلاحي :'(
و هاي مصطلحات جديدة
طكع


إتعربش : إمسك بقوة .. وعادة تستخدم للتحذير من الإنزلاق أو السقوط ..
أقظب : نفس معنى إمسك ، وقد تستخدم للتمسك بشيء معين




مدعدر: متورم أو منتفخ...




معنعن: يمشي بكبرياء أو نافخ ريشه





طراحة: فرشة أو جنبية




قيشانية: زبدية أو حمامية




زت أو ورر: إرمي




فطرز: تشقلب q19




فكح: مزط او هرب




تلولحي يا دالية: تقال للشخص النحيف جدا وبترخرخ لدرجة الهبل




الطنط: وهو اللي بحكي ياااااي لما يشوف اشي بعجبو




مقلعط: بخزي مقرف




مهوي: يعني ولا حبة – ما في عقل




حفرتل: نوري




دير بالك عحالك: اسلوب تهديد غير مباشر




عندي موضوعك - : تقال عند الاستعداد التام لتقديم خدمة ما




حصتي (بضم الحاء): تُقال عند وجود علاقة صداقة أو مصلحة قوية تربط بين شخصين




ولا إشي!! : تقال للتعبير عن الدهشة من شدة موقف ما، وتلفظ على النحو التالي : إمّا بتشديد الكلمات أو كما يلي : ولااااااااااا إشي




إجبد : ُستخدم عند الإعجاب بموقف شخص ما




شو بالنسبة !: تُقال عند الاستغراب من شيء أو شخص




صااااااااااااح؟ : للتعبير عن الموافقة التامة




كيف حالك إنت ؟: تقال لمن يقول شيئا غريبا أو غير منطقي




طقع : أشهر من أن تعرّف... تُستخدم للتعبير عن الإعجاب الشديد

[اسوار القدس]

تع  جاي مين هاض الي قاعد بتمسخر على الحشي الفلاحي
بعدين  هيك ما بزبط لازم تشتب جمله كامله ورد كامل شلها بالشاف
ههههههههههههههههه
على الجيرة  ما راح تعرف تقرا شو انا شتبت
ههههههههههههه
والله  ما احلى لهجتنا  سواء كانت  لهجه فلاحين او مدن على فكرة اللهجه بتعرف على المنطقه قبل ما الشخص  يعرف عن نفسو من اي منطقه هو
 
مششور  خييو  الفارس العربي

[الفلامنجو]

اي ي ي لاع ع ع ع ع ، سايك عليكم الله منتوا كايمين الا بعد العشا ..وينتش يااامرة ..تعي هون لاكولك ..كربي ولي ..كربي تشمان شوي..وللللك كربي شو شايفتيني بعبع كدامك مني خفت منك لما تجوزتك..متذتشرة ولا اذتشرتش ..
هسا ابو كاسم وابو تشامل (يعني كامل) والحج مرعي الاسمر ..
بتنط هيا تسالوا : مين الزبون الجديد طخ هااظ..
برد عليها بعد رفعة حواجبو لفوك فوك : ولتش هاااظ الى تشان يتضمن مارسنا وزتنونات اهلتش كبل خمسطاشر سنة ..
بترد بعد ماتحط ايدها على عبها وبقوة : ابو النسوان هااااظ..مووووش هاااظ اللي اخذ الشكرا هريبة كال شو بدو يعمل مثل الشرجس (الشركس) ومرتو كاينة بالمستشفى تولد..ياحصيرتي عليها وعلى هذيتش الليلة اي ريتها ماتت ولا شافت زكمو..
برد وهو مش عاجبوا : اه اه اه هو بذاتو..
ترد عليه شومالك ..اتكطعش حتشيي (كلامي) وانا بحتشي كلتلك ميت مرة هيتش..زبدة الموضوع ابديش اعمل عشاء لهيتش زكووم..يالله من غير مطرور تشل واحد ع دارو ..خلي نسوانهم المصفصفات يعملولهم كلعاااااط..
برد عليها وايدو في نص ثمها بدو يسكروا : ولك هاااظ نيعتش (نيعك او ثمك) اذا فتح ياباي عليه..اي شوال طحين مابسدو..طيب اعمليلنا ابريك شاي و موش تنسي تزبطيه بالميرمية (بحكي كلمة ميرمية وهو ببرم شفتو بحركات سريعة تكرر حرف الراء ميرررررررمية)..(بتشهون الزلمة)..
بترد عليه : لاشاي ولا سخام ..كلهم انو مرتك نايمة ..مش هون تعبانة دبررر حالك..يابو كشل..
انا بكووول ابنك طالع على مين طلع طالع عليتش..اه ولا..ع مين بدو يطلع ان تشلا ( يعني) ..وبعدين شو هالضيوف اللي بيجو يزوروا على غيرش تلا..(صدفة او مفاجئة)..

(كل هاظ الحكي تشان ع باب الصالون..) شوية سمع الزلمة الخيخة هااظ صوت لرجال ويبدوا فهموا ايشي ..واذا هم مودعين..

طيب فتناتش بعافية بتشرة بنلاكيك ع كهوة ابليس اللي ع مفرك الواد..
سمع واحد منهم وهو طالع بحكي وبكول اي والله لو هاي المرة عندي لورجيتكم فيها..
بترد عليه مرت الزلمة : مش لما تكدر ع ممرتك ياحصيرتي عليك..مهي الاسبوع اللي فات طرتك من الدار ونمت في البيارة مثل الزعران..
الزلمة بردك مغير الموضوع ..خير خير زارتنا البرتشة والله..ان بتشرا بنتلاكى باذن الله...




ينتهي المشهد هنا..ساعود لاكمل معكم باذن الله ..الكعدة ع الكهوة فتحت مواضيع كثار ..تشونو معنا..

حوطتكم بالله

[وردة الاقصى]

هعععععععععععععععععععععععع

شو هاد مفهمتش حاجه منهم معقول احنا كنا نحكي هيك مش معكول لا لا ماتكولولي مش معكول
صار بدي مترجم على هلحال هههههههههههه

شكرا الكم على هلحشي هههههههه

[خنساء فلسطين]

ههههههههههههههههههههههه والله شي حلو تشثير

بس ما بتشوفو انو صعبة شوية اللهجة الفلاحية؟ ولا هي مسألة تعود؟؟؟؟

حبيتها كتير والله خلص هالصفحة عملتها بالمفضلة وراح ادخل مرة واتنين وتلاتة

عموما لسة هاللهجة حية خاصة بقرى الضفة

يسلمو ع الموضوع الظريف

[ليث الاسلام]

في كمان كلمات تضاف الى ما تم ذكره

كمبوطة = زهرة
ما الكش خراف = مش ماسك ممسك علي
ع الهودة = ع النزول
بدي افركع = بدي اطق
نك الكرة = شاتها
على قصة الحكي الفلاحي في هناك حجة كانو ها الأولاد يلعبو قدام بيتها كرة قدم في واحد منهم نك الكرة (شاتها ) بقوة كسر زجاج شباك الحجة طلعتلهم الحجة : عزا في وهودكم حتى وانبلى الله يشسر ايديه ( يكسر ) واجريه اللي شسر الكزاز ( كسر )المهم في النهاية استسلمت الحجة للأمر الواقع وراحت عند محل الكزيز ( بائع الزجاج ) عشان تركب كزاز بدل اللي انكسر .
قالت الحجة للزلمة : مرحبا يا اخوي
أهلا يا حجة
انتي اللي بتكزز
لا يا حجة انا اللي بكلعط اخوي اللي بكزز

ودمتم

[الفلامنجو]

طبعا للقارئ اسوقها ..كلمة بكزز تحتمل في العامية معنيين..اولاهما انه صاحب مهنة الزجاج والاخرى وهي التي فيها سر النكتة انه مقرف اي مقزز..



ليث الاسلام

منذ مدة  لم اضحك بشراهة ونهم ..اشكرك جدا على هذه الكصة اللزيزة...


كن بخير

[عبق فلسطين]

بنحمد الله انو احنا شعب انخلك خفيف الظل كوي البنية هاذي اللهجة هي تراثنا وهي اصلاتنا وهي كل شي بيميزنا عن غيرنا بهالعالم
انا بنبسط لما اكون كاعدة مع اجدودي وبسمع هالحكي  والكاكم على خير
شكرا كتير الموضوع حلو